Aşgabatda Howanyň üýtgemegi boýunça ýaşlaryň jemleýji milli maslahaty geçirildi
Türkmenistanyň Hökümeti BMG-niň Hemişelik utgaşdyryjysynyň edarasy, BMG-niň Ösüş Maksatnamasy (BMGÖM), Azerbaýjan Respublikasynyň, Beýik Britaniýanyň we Birleşen Arap Emirlikleriniň Türkmenistandaky ilçihanalary we Germaniýanyň Halkara hyzmatdaşlyk boýunça jemgyýeti (GIZ) bilen bilelikde Howanyň üýtgemegi boýunça ýaşlaryň jemleýji milli maslahatyny geçirdi.
Türkmenistanyň Daşary işler ministrliginiň Halkara gatnaşyklary institutynda geçirilen maslahat sebitiň ähli künjeginden gelen ýaşlary bir ýere jemlemek bilen, olara möhüm daşky gurşaw meseleleri boýunça pikir alyşmaga we howanyň üýtgemegine garşy göreşmäge ýaşlaryň gatnaşmak mümkinçiliklerini ara alyp maslahatlaşmaga ýardam berdi. Bu barada Türkmenistanyň DIM-niň resmi saýtynda habar berildi.
Maslahatyň işine Azerbaýjan Respublikasynyň ilçisi Gismet Fizuli ogly Gezalow, Beýik Britaniýanyň ilçisi Stiwen Konlon, BAE-niň ilçisi Ahmet Al-Hameli, BMG-niň Türkmenistandaky Hemişelik utgaşdyryjysy Dmitriý Şlapaçenko, ÝB-niň Türkmenistanda ýaşyl ösüş boýunça maksatnamasynyň müdiri Karolina Milow, Durnukly ösüş maksatlarynyň (DÖM) ýaş ilçileri, işjeň raýatlar, şeýle hem BMGÖM-niň, ÝUNISEF-iň, FAO-nyň, Ýewropa Bileleşiginiň, GIZ-iň wekilleri we Türkmenistanyň Daşary işler, Bilim we Daşky gurşawy goramak ministrlikleriniň hünärmenleri gatnaşdylar.
Ýaşlar maslahaty Türkmenistanyň dürli künjeklerinden 700-den gowrak ýaşlaryň gatnaşmagynda Howanyň üýtgemegi boýunça Ýaşlar maslahatynyň (COY 19) we BMG-niň Howanyň üýtgemegi boýunça Çarçuwaly konwensiýasyna gatnaşýan taraplaryň maslahatynyň (COP 29) 29-njy mejlisiniň öňüsyrasynda geçirildi.
Maslahat ýaş nesliň howanyň üýtgemegi, onuň durmuş-ykdysady ösüşe, ekologik durnuklylyga we bioköpdürlilige ýetirýän täsiri barada habarlylygyny ýokarlandyrmagy, şeýle hem howanyň üýtgemegine uýgunlaşmaga we netijelerini azaltmaga ýardam berýän innowasion çözgütleri ornaşdyrmakda umumy çemeleşmeleri işläp düzmegi maksat edinýär.
Habarda bellenilişi ýaly, bu ýyl maslahat Türkmenistanyň sebitlerini hem öz içine aldy. Şunuň bilen baglylykda sebitleýin maslahatlar Daşoguz, Balkanabat, Mary, Türkmenabat şäherlerinde we Aşgabat şäheriniň Büzmeýin etrabynda geçirildi.
Birinji bölümçäniň çäginde Ozon merkeziniň wekilleri Ozon gatlagyny goramagyň halkara güni barada çykyş etdiler. Soňra ýaşlar welaýatlarda geçirilen maslahatlaryň netijeleri dogrusynda gürrüň berdiler.
Ikinji bölümçede gatnaşyjylar iş toparlaryna bölündiler. Her bir iş topary ekologiýa bilen baglanyşykly meseleleriň dürli taraplaryny we mümkin bolan çözgütlerini ara alyp maslahatlaşdy.
Bilermenler we utgaşdyryjylar her bölümçäniň maksatlarynydyr garaşylýan netijelerini beýan edip, çekişmelere ýolbaşçylyk etdiler. Ara alyp maslahatlaşmagyň netijelerine esaslanyp, her bir topar Türkmenistanyň Ýaşlar beýannamasynyň deslapky nusgasy üçin teklipleri taýýarladylar.
Jemleýji bölümçede işçi toparlaryň ýolbaşçylary howanyň üýtgemegi bilen baglanyşykly Ýaşlar ýol kartasyna girizilen anyk teklipleri berdiler. Bu teklipler COY 19-da we COP 29-da hödürlenjek Türkmenistanyň Ýaşlar beýannamasynyň jemleýji nusgasyna giriziler.
